2022 წლის 19 თებერვალს საქართველოს კრიმინოლოგიის მეცნიერებათა აკადემიის საპატიო მეგობარს, გამოჩენილ ინჟინერს, მეცნიერს, გამომგონებელსა და საზოგადო მოღვაწეს, საქართველოს კულტურის ფონდის თავმჯდომარეს, საქართველოს მეცნიერებათა ეროვნული აკადემიის აკადემიკოს თამაზ შილაკაძეს 90 წელი შეუსრულდა.

2022 წლის 14 მარტს საქართველოს კრიმინოლოგიის მეცნიერებათა აკადემიის საპატიო აკადემიკოს, ქართული სისხლის სამართლის სკოლის ფუძემდებლის პროფესორ თინათინ წერეთლის მოწაფესა და საქმის ღირსეულ გამგრძელებელს, ახალგაზრდა იურისტთა თაობების აღმზრდელსა და მოამაგეს, იურიდიულ მეცნიერებათა დოქტორს, პროფესორ ოთარ გამყრელიძეს 90 წელი შეუსრულდა.

„იუსტიციის სამინისტრომ კიდევ ერთი დაპირება შეასრულა, ჩვენ უკვე გამოვეცით ჟურნალ „იუსტიციის“ პირველი ნომერი. ჟურნალი იქნება ხიდი მეცნიერებასა და პრაქტიკას შორის, მისცემს ბევრ ახალგაზრდა მეცნიერს შესაძლებლობას, თავისი ნააზრევი გააცნოს ფართო საზოგადოებას“, – ასე შეაფასა იუსტიციის მინისტრმა რატი ბრეგაძემ ჟურნალ „იუსტიციის“ პირველი ნომრის გამოსვლა. ჟურნალის რედაქტორია, საქართველოს იუსტიციის მინისტრის მრჩეველი, საქართველოს კრიმინოლოგიის მეცნიერებათა აკადემიის აკადემიკოსი მინდია უგრეხელიძე.

2021 წლის 21 დეკემბერს საქართველოს მეცნიერებათა ეროვნულმა აკადემიამ, საქართველოს კრიმინოლოგიის მეცნიერებათა აკადემიამ, გრიგოლ რობაქიძის სახელობის უნივერსიტეტის სამართლისა და კრიმინოლოგიის სამეცნიერო-კვლევით ინსტიტუტმა საქართელოს მეცნიერებათა ეროვნულ აკადემიაში ჩაატარა მესამე საერთაშორისო სამეცნიერო კონფერენცია

„დანაშაულობის კვლევის აქტუალური საკითხები“

რომელიც მიუძღვნა ა.ა.ი.პ. „დანაშაულობის კვლევისა და პროგნოზირების ცენტრის“ დაარსებიდან 20 წლის იუბილეს.

კონფერენცია გახსნა და მონაწილეებს მიესალმა -საქართველოს მეცნიერებათა ეროვნული აკადემიის პრეზიდენტი, აკადემიკოსი გიორგი კვესიტაძე;

კონფერენცია მონაწილეებს მიესალმნენ:

-საქართველოს კრიმინოლოგიის მეცნიერებათა აკადემიის პრეზიდენტი; გრიგოლ რობაქიძის სახელობის უნივერსიტეტის სამართლისა და კრიმინოლოგიის სამეცნიერო-კვლევითი ინსტიტუტის დირექტორი, პროფესორი მალხაზ ბაძაღუა;

-გრიგოლ რობაქიძის სახელობის უნივერსიტეტის რექტორი, პროფესორი მამუკა თავხელიძე;

-ამერიკის კრიმინო­ლოგიის საზოგადოების აღმასრულებელი დირექტორი, ნებრასკას უნივერსიტეტის პროფესორი, კრის ესკრიჯი (აშშ);

-ევროპარლამენტის პრეზიდიუმის წევრი; ვარშავის უნივერსიტეტის პროფესორი კაროლ კარსკი (პოლონეთი);

-სოხუმის სახელმწიფო უნივერსიტეტის რექტორი პროფესორი ზურაბ ხონელიძე;

-ბათუმის შოთა რუსთაველის სახელმწიფო უნივერსიტეტის რექტორი, პროფესორი მერაბ ხალვაში;

-ჟურნალ „კრიმინოლოგის“ სარედაქციო კოლეგიის წევრი, პროფესორი მარინე კვაჭაძე;

-საქართველოს მწერალთა კავშირის თავმჯდომარე, პოეტი მაყვალა გონაშვილი, რომელმაც ნაყოფიერი სამეცნიერო, შემოქმედებითი და საზოგადოებრივი მოღვაწეობისათვის საქართველოს კრიმინოლოგიის მეცნიერებათა აკადემიის პრეზიდენტს, პროფესორ მალხაზ ბაძაღუას ილია ჭავჭავაძის სახელობის მედელი გადასცა.

2021 წლის 10 დეკემბერს იუსტიციის სამინისტრო საგრანტო პროგრამის ფარგლებში კონკურსის გამარჯვებულ 14 პროექტის წარმდგენ ორგანიზაციებსა და კერძო პირებთან შესაბამისი ხელშეკრულებები გაფორმდა. მათ შორის საქართველოს კრიმინოლოგიის მეცნიერებათა აკადემიასთან პროექტის “საქართველოს იუსტიციის სამინისტროს სისტემაში სამეცნიერო-კვლევითი დაწესებულების ფუნქციონირების აუცილებლობის შესახებ“ საქართველოს მეცნიერებათა ეროვნულ აკადემიასთან და გრიგოლ რობაქიძის სახელობის უნივერსიტეტის სამართლისა და კრიმინოლოგიის სამეცნიერო-კვლევით ინსტიტუტთან ერთობლივად განსახორციელებლად. ხელშეკრულებას ხელი მოაწერა პრეოქტის ხელმძღვანელმა, საქართელოს კრიმინოლოგიის მეცნიერებათა აკადემიის პრეზიდენტმა, პროფესორმა მალხაზ ბაძაღუამ.

საქართველოს იუსტიციის მინისტრმა, პროფესორმა რატი ბრეგაძემ გამარჯვებულებს წარმატება პირადად მიულოცა.

2021 წლის 24 ნოემბერს საქართველოს მეცნიერებათა ეროვნულ აკადემიაში გაიმართა საქართველოს იუსტიციის სამინისტროს პროექტის “იუსტიციის სამინისტროს სისტემაში სამეცნიერო-კვლევითი დაწესებულების ფუნქციონირების აუცილებლობის შესახებ“ სამუშაო ჯგუფის შეხვედრა.

პროექტს ახორციელებს საქართველოს კრიმინოლოგიის მეცნიერებათა აკადემია, საქართველოს მეცნიერებათა ეროვნული აკადემიისა და გრიგოლ რობაქიძის სახელობის უნივერსიტეტის სამართლისა და კრიმინოლოგიის სამეცნიერო კვლევითი ინსტიტუტის მონაწილეობით, პროექტის განხორციელების ვადებია ა.წ. 1 დეკემბრიდან 2022 წლის 1 აპრილამდე.